Feeds:
Pos
Komentar

Archive for the ‘pengarep arep’ Category

ngawiti ingsung klawan syi’iiran… kelawan muji maring Pengeran….

kang paring rohmat lan kenikmatan… rino wengine tanpo pitungan…

duh..bolo konco prio wanito ..ojo mung ngaji syariat bloko..

gur pinter ndongeng nulis lan moco..tembe mburine bakal sangsoro…

akeh kang apal qur’an haditzse…seneng ngafirke marang liyane..

kafire dewe gak di gatekke..yen isih kotor ati akale..

gampang kabujuk nafsu angkoro…ing pepaese gebyareng ndonyo..

iri lan meri sugihe tonggo…mulo atine peteng lan nisto

ayo sedulur…jo nglalekake wajibe ngaji sak pranatane

jo ninggalake iman tauhid e baguse sangu mulyo matine

kang aran soleh bagus atine kerono mapan sari ngilmune

laku tariqot lan ma’rifate ugo haqiqot manjing rasane…

al qur’an qodhim wahyu minulyo…tanpo tinulis biso di woco..

iku wejangan guru waskito…den tancepake ing njero dodo

kumanthil ati.. lan pikiran rasuking badan kabeh jeroan

muzidzat rosul dadi pedoman minongko dalan manjinge iman

kelawan ALLAH kang moho suci kudu rangkulan rino lan wengi

di tirakati di riyadhoi dziir lan suluk jo nganti lali..

uripe ayem rumongso aman dununge roso tondo yen iman..

sabar narimo najan pas pasan kabeh tinakdir saking pengeran

kelawan konco dulur lan tonggo…kang  podo rukun ora dak sio

iku sunnahe rosul kang mulyo…NABI MUHAMMAD panutan kito

ayo nglakoni sekabehane..ALLAH kang bakal ngangkat drajate

senajan ashor toto dhohire ananging mulyo makom drajate

pangupalastro ing pungasane ora kesasar roh lan sukmane

den gadang ALLAH swargo manggone… utuh mayite ugo ulese

bogor, 22 – 10-2011…..

(dak tulis rikalane wektu kang lumaku  katon kurang yen mung 24 jam…..sinambi ngruokake syi’ir gusdur

Read Full Post »

Ora dak nyono…wektu kang wus lumaku ndadekake isuk kang uput – uput lumintir sore lan petheng ndedet….bakal dadi wengi kang dowo.

Duh….ora kroso ndadekake lali tumuju marang ora rumongso…tangan kang alus malik kebak kapal lan rai kang wus dadi soyo kriput ngilangake cahyo suminar ayu lan bagus kang sajak ora bakal katerak panas lan udan.

Aku pancen ora kuwowo,ananging lungguh adem ing pikir,unjal ambegan kanthi  temoto lan pawawas kang kudu titis amargo lantiping  ewon kahanan kang lumaku ndadekake kroso laku rumongso…

Embuh…yen laku mung adohe sobo pithik, dak kiro pawas lan roso kang  wus kudu owah mesti di duweni,dudu romongso mongkog lan nyawang cilik marang liyan…ananging antenging pikir lan jabat swasono kanggo sopo wae……

Aku pancen rumongso cilik!…mergo ing pandelengku bakal ono awan, sore lan bengi……kang ora bakal dak selaki…….mung opo yo arep ajeg ing pawawas lan endahing kulitmu ora bakal katerak ketigo lan rendeng?……meneh meneh..opo isuk lan soremu arep tansah kanggo nyimpen loro ati?

Wis to…….pangandikan kang apik ora kebak cubriyo lan pandongo swasono banjur endah kang kasawang dening konco opo kui pancen abot kanggomu?…..

@cileduk_cikupa_bandung_ jogja…..maret 2011

Read Full Post »

Sworo adzan magrib mungkasi anggonku pakaryan,ambune kringet kang wayu kawit pendak sore mekso aku lumaku  lungguh sesenden ning pojok padhon serambi mesjid.

Aku ora ngiro yen kahanan lan pakaryan iki iso dak lakoni,pakaryan kang sakperangane konco nyepelekake,muskil ngono kandane.Bathin kang olo mau ndadekake pandongo ing bathinku.

Modar cocotmu! pungkasane gunemanku ning se’la- se’laning sendal jepit kang antri ning ngarepku.Jebul owah gingsiring kahanan kuwi ora keno di sepeleake’ kahanan bakal owah lan menungso kui mung sakdremo,tansah ngece lan ngentengake marang liyan lan tumindak dak sio kui bakal getun tembe mburine….mulo tansah eling mulo buko lan tembe mburine ugo pintan wus kacepak ing pogo mung wis karo durung….

Lamun siro banter ojo nglancangi,lamun siro landep ojo natoni ,lamun siro pinter ojo nguroni…

suwun gusti..Dak pungkasi sak bubare tanda tangan kwitansi pembayaran pelunasan,banjur age age adus lan makmum magrib.

Pondok pesantren Al-hidayah,desa sumber Kec Karangrayung Grobogan

7 jan 2011 06.00

baca versi bahasa Indonesia.

Read Full Post »

rikalane padhange awan kang sumurat endah ing sesawangan..

aku ngejo ayu  rupamu..

sumunaring srengenge  sore  sumurat ing paras lan esemmu..

sajak ngowo makno…

ngejo impen endah ing sak dawaning wengi kang bakal lumaku…

wengi lumaku sangsoyo petheng….

rikalaning tengahing impen kang kaejo sliramu gagap dadi cidro…

luntaking eluhku ora kuwowo ngendheg kendating atimu ..

janji tresno kaejo muspro….

aku ora kuwowo… malik pethenging wengi …

cidroning crito pupus ing petenging wengi…

…”iki isih wengi nduk..pandeleng lan swasono ora katon”…

ukoro ing telenging pandulu ngroso abot marang sliramu kang wus sirno..

dak entekke..dawaning wengi rinujit tanpo sliramu…

esuk kang endah…srengenge sumunar ngebaki ati..

nelesi dalan padang katon kaejo  sumurat ing pangangen angen…

aku isih tanpo sliramu nduk…..

ananging yekti yen uculing genggenman tanganmu isih kroso..

…tak ejo endahing suryo kang nyoto….

 

 

kanggo sliramu  tilasing tapak g sumbing kang wus lumaku 00.15  sumbing wonosobo.20 nov 2010 -22 nov 2010

 

Read Full Post »

Watuk ngekel ing dada iki isih kroso abot,rikalaning aku isih tetep gogok ana cakruk pojok omahku ing wengi iki.Telenging pikir kang muter owah gingsiring kahanan ora ndadekake mripat iki  kroso abot nadyan boyok iki krasa pegel lan anyesing hawa atis tekan njero balung.

Mung kari turahan wengi,rikalane pangangen -angen ing pikir iki lumaku ora kendat,mowo udud kang dak sedot kala -kala madangi sak pengarepku kejobo sakliyane  pandelengku kang petheng ndedet,Samar samar isih keprungu TOA nyuarakke takbir kang di setel seko VCD. (lebih…)

Read Full Post »

tumetesing eluhmu ora netesake atiku…

sikilku kang wus jumangkah lumaku tanpo swara…

yen pucuking atiku wus rinojit dening janji kang ora dak mangerteni….

banjur sopo?…pitakon kuwi ora kendhat ing telenging kupingku….

pancen aku wus nglerwakke kowe…

ananging ngertio cah ayu….

yen iku lumaku tanpo tumuju..

panggayuhmu lintang kang sumunar..

lan aku ora bakal kuat nyembadani…..

ngertio nduk cah ayu…..

yen roso tresno iki dak buntel rapet sak pangarepmu…

nadyan eluhmu ngetung dawaning wengi….

…….gunungmenoreh,wengi juli 2010

Read Full Post »

Wus sakwetoro suwe,klamat manggon ono sela-selaning bangunan iki,ora tau di resikii opo maneh di saponi pamrihe’ bali sumunar mane’h.Jogan kang menceret rikalane semono mung ninggal crito katresnan kang tansah ngreridu ing janji.

Sawangan kang katon elok lan endah wektu kui gawe sumunaring ati kang kebak  endahing swasono,ora ono cidro.Yen mung mendung kang katon, koyo koyo ora bakan menehi udan barat kang gedhe…ananging mung grimis  kang ndadekake kluwung edi peni werno- wernone…….

Kahanan kang lumaku ora kroso wus ngikis janji lan kahanan…..Sesawangan kang sarwo endah wektu kuwi musno muspro tanpo guno,ilang dening aboting pacoban urip kang mider ora oncat seko bangunan omah iki.

(lebih…)

Read Full Post »

Older Posts »